ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានផ្ញើសារចូលរួមរំលែកទុក្ខជូនក្រុមគ្រួសារមហាឧបាសិកា ញឹម តេង ជាម្តាយក្មេករបស់ ឧបនាយករដ្ឋមន្រ្តី ម៉ែន សំអន ដែលបានទទួលមរណភាពក្នុងជន្មាយុ ៩៤ឆ្នាំ ដោយរោគាពាធ។

ក្នុងលិខិតរម្លែកទុក្ខចុះថ្ងៃអាទិត្យ ទី៤ ខែកញ្ញានេះ សម្ដេចតេជោ ហ៊ុន សែន បានថ្លែងថា៖ «ខ្ញុំនិងភរិយា សូមសម្តែងនូវការសោកស្តាយ ស្រណោះអាឡោះអាល័យ ចំពោះការបាត់បង់ម្តាយ ជីដូន និងជីដូនទួត ជាទីគោរពស្រឡាញ់បំផុត ប្រកបទៅដោយព្រហ្មវិហារធម៌ដ៏ជ្រាលជ្រៅចំពោះកូនៗ ចៅៗ និងចៅទួតទាំងអស់។ ទោះបីរូបកាយរបស់ មហាឧបាសិកា ញឹម តេង បានបាត់បង់ទៅមែនពិត ប៉ុន្តែអំពើជាកុសល កិត្តិយស សេចក្ដីថ្លៃថ្នូរ នឹងនៅស្ថិតស្ថេរក្នុងសន្តានចិត្ដកូន ចៅ និងញាតិមិត្តជិតឆ្ងាយទាំងអស់ជានិច្ចនិរន្តរ៍»។

សម្ដេច និងសម្ដេចកិត្តិព្រឹទ្ធបណ្ឌិត បានបួងសួងដល់ ដួងវិញ្ញាណក្ខន្ធមហាឧបាសិកា ញឹម តេង សូមឆាប់បាន ចាប់កំណើតកើតក្នុងសុគតិភពកុំបីឃ្លៀងឃ្លាតឡើយ។

គួរឲ្យដឹងផងដែរថា ម្ដាយក្មេកលោកស្រី ម៉ែន សំអន មហាឧបាសិកា ញឹម តេង បានទទួលមរណភាពនៅរសៀល ថ្ងៃទី៤ ខែកញ្ញា ឆ្នាំ២០២២ វេលាម៉ោង ១និង៤០នាទីរសៀល បច្ចុប្បន្នសពរបស់អ្នកមហាឧបាសិកាត្រូវបានតម្កល់ទុកធ្វើបុណ្យតាមប្រពៃណីព្រះពុទ្ធសាសនា នៅផ្ទះលេខ១ ផ្លូវលេខ៥ គម្រោងទី៥ បូរីប៉េង ហួត ច្បារអំពៅ៕